Henda kunning er til borgarar í Hvannasunds kommunu, sum hava havt samskifti við Klaksvíkar kommunu, Norðoya Bú- og Heimatænastu (NBH) og Barnaverndartænastuna í Norðoyggjum.

Sum tey flestu helst vita, so hevur Klaksvíkar kommuna verið úti fyri einum álvarsomum telduálopi, har óviðkomandi eru komin fram at skipanunum hjá kommununi og harvið eisini hjá NBH og Barnaverndartænastuni. Sostatt hava bæði vanligar og viðkvæmar persónsupplýsingar verið á skeivum hondum. Klaksvíkar kommuna, NBH og Barnaverndartænastan í Norðoyggjum hava boðað Hvannasunds kommunu frá, at tey nú aftur hava ræði á øllum upplýsingunum, men kunnu ikki við vissu siga, at teldsníkarnir ikki hava tikið avrit av upplýsingunum.

Trygdarbrotið fevnir millum annað um upplýsingar um borgarar í Hvannasunds kommunu, sum eru skrásettir hjá Klaksvíkar kommunu, NBH og Barnaverndartænastuni. Hesar upplýsingar kunnu eitt nú vera navn, bústaður, p-tal, kontunummur, yrkisfelagsligt tilknýti og aðrar viðkvæmar persónsupplýsingar í sambandi við málsviðgerðir.

Hvannasunds kommuna hevur avtalu við Klaksvíkar kommunu um, at Klaksvíkar kommuna veitir børnum og ungum búsitandi í Hvannasunds kommunu barnatannrøkt. Av tí at barnatannrøktin hjá Klaksvíkar kommunu eisini varð rakt av trygdarbrotinum, eru upplýsingar um tey, sum hava verið í sambandi við barnatannrøktina í Klaksvíkar kommunu, rakt av trygdarbrotinum.

Endamálið við hesi kunning er at geva øllum møguleika at taka neyðug stig og fyrivarni fyri at tryggja seg, nú persónupplýsingar hava verið á skeivum hondum.

Trygdarbrotið kann viðføra m.a. hesar vandar:

• Persónar kunnu royna at nýta p-tal ella aðrar upplýsingar til m.a. samleikastuldur ella svik
  
  
• Við atgongd til persónsupplýsingar kunnu óviðkomandi royna at lumpa fólk at veita fleiri upplýsingar ella penga

Her eru nøkur stig, ið kunnu takast fyri at forða fyri misnýtslu av persónupplýsingum:

• Verið varin, um tit fáa óvæntaðar teldupostar, SMS-boð ella telefonuppringingar, har biðið verður um persónligar upplýsingar, innritanarupplýsingar ella pengar
  
  
• Trýstið ikki á ivasamar leinkjur og
  
  
• latið ikki persónsupplýsingar til óviðkomandi
  
  
• Broytið veik loyniorð til sterk loyniorð - sí t.d. kunning frá Gjaldstovuni her: https://gjaldstovan.fo/Gjaldstovan/kunning/tidindi/kt-tilbugvingin-a-gjaldstovuni-haekkar-nu-netalop-er-innan-landoddarnar/ 
   

Um tit hava spurningar, ella tykkum tørvar fleiri upplýsingar, eru tit vælkomin at seta tykkum í samband við okkara dátuverndarfólk, Jónas Tór Næs, adv. á telefon 222838 ella teldupost: dpo.hvannasund@faroelaw.fo 

Klaksvíkar kommuna hevur kunnað Hvannasunds kommunu um, at arbeitt verður av øllum alvi við at framtíðartryggja allar dátur.

Meiri kann lesast um netálopið á heimasíðuni hjá Klaksvíkar kommunu við at trýsta HER